Kwent cheen mbak rop konej

Ngu tub welt lee tub mbak le Bonch, nkwaan baal gaw. 

Lee tub mbizh ngwano Teng rot naz Xanden. Nu mreke Bonch tich xaa nel nyen doo ma rot. Zee mzhin wen nu lee rot ndaw. Lee rop xaa Bonch nzob xkal xan yag zin.

mbak

Zee ngunii xaa lo Bonch:
—¡Lajer gok Bonch, nel lo rot baa tant nro nek!
Nu le ma mkeb nzhé:
—¡Nalet lu kas! ¡Naxnaat na!
Nu lee rot dub golp marelo nu nzhé ma:
—¡Bonch, Bonch! Kare, kare, lee nek mroo nee. Kare, kare lee nek mroo nee.

Nu lee Bonche mrexonn nzhake. Zu lee nek mzere yenn naz tras, le Bonch rol tras nzhe. Nu lee nek nzhé: 
—¡ja, ja, ja! Nalet lu gan kab lu na, nel ngoxla lu.
Zee lee Bonch nzhé: 
—Nexti per lee na gaw dub zhit lu. Nu kwenta bich reke na tich lu.

Zee mkeb nek
—Nalet lu gan zen lu na, nel lee na nya garli na leen jot.
Zee lee Bonch mxooy: ¡jauuu, jauuu, jauuu!
Nu lee Teng mbin lee Bonhe mxooy, nu nzhé:
—Nal yasewii na cho kwaan nzak Bonch.
—Nu gorna mzhin xa lee ma kacheep yek xan ke. Nu nzhé ma:
—Lee nek nzho leen jot.
Nu lee xaa mkeb:
— Nalsi lee be gaw mol, nexti xmoda.
Nu mzelo xaa mdeen xaaya, kwaan xronk xaa. Nu nzhé xaa lo Bonch:
— ¡Lajer zo napa lee nek kale gan, zee nagawt be mol! 

 

 

  Nu lee Bonche nebsa nkun kol nu nzhé:
— Nela na ya. 
Zee lee rot mzhin lo xaa, nu nzhé:
— ¡Gu si nachan! ¿Chogon nek le gan lo gu?
Nu lee bonch nzhé: 
— Naleta kas, leen yann nzho nek.
Nu lee nek mlu lo Teng. Zee mcheep xaa yaa xaa leen yeer. Nu nguga nii ma lo xaa. Per lee nek nzhe: 
—¡Cho le lu na! 
Lee Teng mkeb nu nzhé: 
—¡Mol gaw na lu! 
Nu lee Bonch nzhé: 
—Kas nangot lu kwent na ze.

Nu lee xaa nzhé: 
—Bonch, nalet lu kas. Lee lu gaw lextoo ma.

Conej

Zee le nii  ma nguga lo Teng nu nyakdoola xaa. Per mer gorna nzen xaa nii ma nu lee tub xog mgun nu tira nanzentra xaa nen ma ma. Per lee nek chopaka mkee briink nu mrexon nu nzhé ma: 
Jajajajajaajajaja gu si nachan doo. Zee lee Bonch nguneya nu nzhé ma: 
La nen che  wli luya. Nu mreke ma tich  nek  zee  chaz mzen ma tich yen nek nu nzhe ma: 
Lu si nye xonn ne, nal si gaw na lu kwaan dub zhit. 
Zera le Teng nguxche nel mkaw xaa nu tira ngok nachan yek xaa nu mbezh xaa : 
Pa nzha ma Bonch, Mle ma gan. 
Zera nzen xaa ne cho bchog yek xaa nel mlaya lo yo gorna mgun xog nu leeka gorze lee bonch nzhé lo xaa: 
Lee ma nee,   nalet lu kas, che nanet lu nyent cho nzho mod le gan lo na. Zee lee Teng nixdoo ngok lextoo, nel nguga nek lo Bonch. Nu lee Bonch  Nyakdoola. 
Nu  zera  ngulo msiyenn xaa ma. Nu nales doo mbezh ma. 

mbak rop konej

Lee mzhel yizhyo, nyano xaa ma garli xaa. Zee nzhé xaa lo re xinn xaa: 
—Nalsi gaw be tub mol bxul, nel nguga tub nek lo rop nu Bonch. 
Zee lee xgwnaa xaa nzhé: 
—¡Ay, sa be, nalsi gaw be tub mol! Nel nzhala mbizh ndaw be ma. 

Zu lee sa xaa nguxii rese kwaan ngule ma. 
Lee Bonch nzhé: 
—At ne lu lo na zaa lu lextoo ma gaw na, nu zeeraka zaa luya. 
Per lee Teng mkeb: 
—Nalet lu xgab. Nal gaw lu xtrip ma. 
Nu lee Bonch nlaan doo, nu nzhé: 
—¡Xtrip na, xtrip na, xtrip na! 

Nu lee Teng mlabiya lo Bonch. Nu xwa nguzhe lextoo Bonch. Per lee Teng naldoo mol ndaw. Nu stub mbizh zee mlob lextoo Teng nel tant ndaw Teng nall mol. Zee lee xngwnaa xaa ngwaxii yix maistra nu mzob meya lo ki nu mzaa meya ngu xaa. Zee ngokwen lextoo Teng. Nu snee lal gwuze lextoo  Bonch  nu Teng.
 

Kwaan nee mke: Valeriano Santiago Martínez na Gregorio Martínez Santiago

Share