Re kwaan gro mle Jesus

Ngwnaa me mgal cho xab Jesús
mujer que toco el manto
Nu gorna nzha Jesús zyen doo myet nzhake tich xaa nu ntaaw doo re myet xaa. Lo re myet zee nzha tub ngwnaa, me nzhala chiibchop liin ne nzak. Tubka nded ren lextoo me. Nu mlux me rese kwaan nzhap me ngwa me lo re doktor, nu nik tub xaa namlet gan sekwen me. Ngwnaa ne mbii naz tich Jesús, nu mgal me cho xab xaa. Nu leeka gorzee lee ren kwaan ded lextoo me mlaz. Zee lee Jesús mnabdizh:
—¿Cho mgal cho na?
Nu rese xaa nzhé:
—Namgalt na cho lu.
Per lee Pér nzhé:
—Maestr, rese xaa ntaaw lu nu nzobya lu.
Kwaanzee Jesús mbare nzhé:
—Nzho tub myet mgal cho na, nel mzeen na mroo yalngezh cho na.
Per lee ngwnaa ne nyent mod kaxlaan me nzheb me nu mbii me gax mkichxub me lo Jesús. Nu nzhé me delant lo re xaa, cho zhiin mgal me cho xab Jesús, nu xomod ta ngokwen me mgal me cho xab xaa. Jesús nzhé lo me:
—Xchap na. Nel mwii lu lo Dios, zee ngokwen lu. Nal wen nya lu.
Lucas 8:42b-48

 

 

Jesús mseban Lach
 

Stub welt Jesús nales doo nzhak lextoo xaa, gorna mbii xaa roo baa. Baa ne nak tub yiloo, kwaan nyaaw roo kwaan tub ke. Nu Jesús nzhé:
—Bre gu ke.
Mart bzan ntagol nzhé:
—Me Nabeyy, ech nawent nlaa me, nzhala tap mbizh ngut me.
Jesús mkeb nzhé:
—¿Che nanit na lo lu, chelee lu wii lu lo na, ne lu lo re kwaan chul cheen Dios?
Mre xaa ke, nu Jesús mwii naz yiba nu nzhé:
—Xuz, za na dixkix lo lu nel mkenzha lu xtizh na. Na ne tubka nkenzha lu xtizh na; per nii naya zee lee re myet, xaa nzo nee, ne lee lu mxaal na.
Gorna ngulo ngunii xaa kwaane, dublegan nzhé xaa:
—¡Lach broo baa!
Nu lee xaa ngut mroo nduuzh nral ler, nu noka yek xaa nral ler. Jesús nzhé:
—Bxek gu xaa nu laa gu nya xaa.
Juan 11:38-44

 

 

Jesus mloo mbi mal lextoo xaa Gadara
Mzhin xaa stub ta roo nistoo cheen Galilea yizhyo kwaan le Gadara. Nu gorna mla Jesús leen kano zee mroo tub xaa yezh, mbii gax lo Jesús. Xaa ne nzho mbi mal lextoo. Nzha zyen doo mbizh nanzhaktra xaa xab xaa, 

gadara

nixa nanzhotra xaa li xaa, sinka lee xaa nyu duzna leen yeer pa nyu re xaa ngut. 28 Gorna ngune xaa lo Jesús, nu mkichxub xaa lo Jesús nu mbazhe xaa nzhé xaa:
— ¡Naab na lo lu nateedt lu nu bid!
Nzhé xaa kwaane, nel Jesús mgalno re mbi mal kwaan nzho lextoo xaa, zee mrooya lextoo xaa. (Zyen welt nzen nye mbi mal xaa. Nu nixa nkado re myet yaa xaa nu nii xaa kwaan kaden, per nle xaa gan nchoog xaaya nu nzhe mbi mal xaa naz wen.) Jesús mnabdizh lo xaa:
—¿Cho le lu?
Nu lee xaa mkeb nzhé:
—Na le Zyen Doo.
Nzhé xaa kwaane, nel zyen doo mbi mal nzho lextoo xaa. Nu lee re mbi mal ngunaab lo Jesús:
—Nagubit lu re nu leen yerdoo.
Nel gax zee nzhi zyen doo kuch kayaw, zee lee re mbi mal nzhé lo Jesús:
—Laa zeeb re nu lextoo re kuch ba.
Nu zee lee Jesús mzeyal. Nu lee re mbi mal mroo lextoo xaa nu nya ngu lextoo re kuch. Nu leeka gorzee mzelo re kuch mrexonn nkato naz yat nu mla axta leen nistoo. Nu ngwep re ma nis nu tira ngut re ma.
Per gorna mzeen re xaa nkanap re kuch kwaane, gorzee mrexonn xaa nu nya xaa mzaa xaa kwenta lo re xaa nzo wen nu lo re xaa yezh. Gorzee nzhasewii re myet nen cho kwaan ngok. Nu gorna mzhin xaa pa nzo Jesús, zee mlu xaabyi, xaa mroo re mbi mal lextoo, nzob lo Jesús, nakla xaa ler nu ngokwenla xaa, zee mzheb doo re xaa. Nu lee re xaa ngune ngok kwaane mzaa kwent lo re xaa nen xomod ngokwen xaa ngu mbi mal lextoo. Rese myet, xaa yizhyo Gadara, nzhé lo Jesús zee nya Jesús, nel nzheb doo re xaa. Kwaanzee lee Jesús mzeeb leen kano nu nya. Lee xaabyi kwaan mroo re mbi mal lextoo nzhé lo Jesús:
—Laa reke na tich lu.
Per Jesús mnabeyy xaa, zee lake xaa zee zaa xaa kwent lo re xaa:
—Zyaa garli lu, nu guzh re kwaan mle Dios lo lu.
Lee xaabyi zee nya, nu mzaa xaa kwent kwaan mle Jesús lo rese xaa dub yezh.
Lucas 8:26-39

 

 

Jesús mze lo nis
Gwluzh ngulo mded kwaane, Jesús mxaal re nu, xaa mseed lo xaa, zee yixoob nu leen kano zee ded nu stub ta roo nistoo. Per lee Jesús mlakeka lo re myet axta yilo chech xaa re xaa. Gorna ngulo mxaal xaa re myet nya, nu lee xaa nguxoob yek yi pa wdizhno techose xaa Dios. Gorna ngulo mzhel yizhyo techo xaa nzo baa. Nu lee kano nzha xsaww leen nistoo gorzee. Nu lee mbi nze naz lo kano zee ngit doo nistoo, nu nanlat nis nzeno nu kano naz delant. Nzhaka xnila yizhyo lee Jesús nzhaze lo nistoo nu nyaad gax lo re nu. Gorna ngune re nu lee xaa nzhaze lo nistoo, mbazhe nu nel mzheb doo nu, zee nzhé nu:

—¡Besa!
Per Jesús nguné lo nu:
—Blo gu balor lextoo gu, nazhebt gu, nel naya.
Zee lee Pér nzhé:
—Xaa Nabeyy, cheleeya luya, ble zee noka na ze lo nistoo yal lo lu baa.
Jesús nzhé lo xaa:
—Te nee.
Zee lee Pér mla leen kano nu nzhaze xaa lo nistoo nzha lo Jesús. Per gorna ngune Pér nroo doo mbi zee mzheb doo xaa, nu nzhala Pér naz leen nistoo. Zee mbazhe Pér nzhé Pér:
—Xaa Nabeyy, nalaat lu la na leen nistoo.
Gorzee lee Jesús mzen yaa xaa, nu nzhé lo xaa:
—¡Chepse ngwii lu lo na! ¿Chozhiin nzho stub xgab yek lu?
Gorna nguxoob xaa leen kano lee mbi mlaz. Zee lee re nu, xaa nzho leen kano mkichxub lo Jesús nu mbill nu lo xaa, nu nzhé nu lo xaa:
—Wlipa lu nak Xgann Dios.
Mateo 14:22-33