Xtromp

Leezha chuut na, gorna nzhap na tub chii liin, mkit na lo xtromp kwaan re xmig na.

            Ngu tub mbizh ngwa re na xuz na lo ngoon naz yuu Xro. Nu lee na mdexkwaa tub xtromp kwaan tub mach et ronk, kwaan nandoxt lo. Zee mchoog na tub ram yag bguy kwaan nali nak nu ngol. Zee mzelo na mdexkaa na ma. Lee gorna ngwalo mdexkwaa na ma, zee nazta mbreke klab lo ma, nu karet doo ma.

Zee né xuz na:

trompo

            —Nawent nlu ma lo na.

            Lee na mkeb:

            —Nalet lu kas, nel ngol doo nzoblazh na kano na tub xtromp.

            Lee mzhel yizhyo, zee ngwa na lo re xmig na nu né xaa:

            —Te kit be kambazla nu lu.

            Nu mzelo yalguyit paro nzob xaa zyen doo xle leen rwed, nu onka cho xaa koo xle leen rwed kwaan xtromp, xaa ze  ka xle. Per nal  lee xtromp na nazta nzob klab lo kwaanze namblet na gan xle. Nu zee ngwa naab na yud lo xuz na. Nu né xaa lo na:

            —Nalet lu xgab. Nal dexkwaa na tub ma ka lu.

            Nu lee xuz na ngwa wen naz Lach Chaleey. Nu lee na nal ngwa skwel. Nu leezha mzhel yizhyo, lee xuz na nyaadno tub xtromp. Nu né xaa:

            —Mdexkwaa na tub xtromp lu, xgaan.

            Nu lee na mkeb:

            —¡Wen doo nak xuz na! ¡Nkedoola xaa na!

Nu né xaa:

            —Xgaan, nal mdexkwaa na tub ma tos, zee le lu gan lo re xmig lu.

            Nu lee na mkeb:

            —¡Tikara, tikara!

            Nu mdexkwaa xaa tub ma yag leey, nu gorze mle xaa preb ma, nu tos ma. Nu lee na nzhé:

            —¡Nalsi le na gan! ¡Nalsi le na gan!

            Nu ngol mzhel yizhyo, mzhin na lo re xmig na stub welt, nel ngwala re xaa kitno xaa na nel nanlet na gan lo re xaa, nu karet xtromp na. Nu né xaa:

            —Le prad nel kambazla nu lu.

            Lee na mkeb lo re xaa:

            —Nal gorne. Nu mzob na xle leen rwed, nu zee mzelo yalguyit.

            Zee lee re xaa mkee ma tich xle, nu nanroot xle leen rwed. Zee né xaa:

            —Mas xwa tuga be kee ma.

            Zee mzelo re xaa mkee ma yilo, nu namloot xaa xle leen rwed. Zee né xaa lo na:

            —Lee nal kee lu ma.

            Zee leezha mkee na cha ma. Nu, ¡taz!, mla na ma tich xle. Zee né re xaa:

            —¿Cho zhiin tant xwa nkee lu ma nal?

            Lee na mkeb:

            —¡Stub xtromp kano na nal!

            Zee lee re xaa né:

            —¡Ah, jwina! ¡Kwaanze nali nkee lu ma!

            —Nu nal nel mlo na xle, zee lee na mkee xcha ma. Nu gorna mkee na xcha ma. ¡Tung, tung!, nzhex nzha ma. Nu, ¡toj!, mla ma tich lim. Nu mle na gan rese xle. Zee né re xaa:

            —¿Cha zto lu xtromp lu ka na?

            Lee na mkeb:

            —¡Nagarlota!

            Zee né stub xaa:

            —Chelee lu natot lu ma, zee kib na ma lo lu.

            Nu lee na mraxonn nya, nel ngula re xaa xtromp na. Nu né xuz na:

            —¿Cho non tant nxizh nlu lu nal?

            Zee mkeb na:

            —Nel mle na gan lo re xmig na kwaan xtromp, ma mdexkwaa lu.

Zee né xaa:

            —Neli wii, at ni na lo lu ke le lu gan.

            Zee techo na mkee briink nzo. Nu noka nzhé na lo xaa:

            —Nalsi nkedoola na lu.

Nu mdeezh xaa na.

            Nyentra cho xaa wen nak kwenta xuz na nu xnaa na.

Autor: Gregorio Martinez Santiago